Y Seren

	Rwy'n gwylltio am [ferch o] liw ewyn,

	Duw sy'n gwybod meddwl pawb.

	Os bydd i mi fynd i'w hardal

4	o gariad ati, f'anwylyd hardd,

	nid yw'n fwriad gennyf anfon negesydd serch costus

	yn fy lle i'w chartref draw,

	na thalu hen wraig (swydd anllad)

8	lwyd iawn a ffyrnig i fynd â neges serch,

	na chario llusernau o'm blaen,

	na thorsiau cwyr, pan fydd hi'n nos,

	yn lle cysgu gartref yn ystod y dydd

12	a chrwydro ar hyd y dref gyda'r nos.

	Ni fydd neb yn fy ngweld, nac yn f'adnabod,

	(rwy'n wallgof) nes iddi wawrio.

	Rhag i mi fynd ar goll ar fy mhen fy hun heno

16	mi a gaf heb ddal yn ôl

	ganhwyllau'r Gŵr biau'r byd

	i'm harwain at y gem tlws ei hwyneb.

	Bendith ar enw'r Arglwydd Greawdwr

20	a saernïodd y sêr,

	fel nad oes dim byd goleuach

	na'r seren gron burwen fach.

	Haul y nefoedd uchel,

24	cannwyll chwim ei meddwl yw hi.

	Ni fydd golwg y gannwyll yn diflannu,

	ac ni ellir ei dwyn drwy dwyll.

	Ni fydd gwynt hynt hydref yn ei diffodd,

28	bara'r offeren o frig y nef.

	Ni fydd dŵr yn ei boddi, ffrydiau gwlyb,

	gwylwraig, dysgl bwyd y saint.

	Ni fydd lleidr yn ei chyrraedd â'i ddwylo,

32	gwaelod bowlen y Drindod draw.

	Nid oes diben i ddyn o'i ranbarth

	hela perl Mair.

	Golau fydd ymhob ardal,

36	darn bath o aur melyn gloyw.

	gwir darian gron y goleuni,

	delw haul, gwlithyn yr wybren yw hi.

	Hi a ddengys i mi heb guddio

40	lle y mae Morfudd, gem euraidd a balch.

	Crist a fydd yn ei diffodd o'r lle y bo

	a'i gyrru, nid [am amser] byr y bydd,

	ffurf torth wen gyfan hyfryd,

44	i gysgod yr wybren i gysgu.