Ymddiddan â'r Cyffylog

	'Tydy ehediad tewdwrf,

	Taer gyffylog, lidiog lwrf,

	Manag, edn mynog adain,

4	Mae dy chwŷl; mad wyd a chain.'

	'Ffest a glew y mae'n rhewi,

	Ffo ydd wyf, myn fy ffydd i,

	Ar hynt o'r lle bûm yr haf,

8	Ar guert rhag eiry gaeaf.

	Rhyw gof dig, rhew gaeaf du

	A'i luwch ni'm gad i lechu.'

	'Edn, yt hiroedl ni edir,

12	Ederyn hardd duryn hir.

	Dyred, na ddywed ddeuair,

	Lle mae a garaf, lliw Mair,

	Lle gofrwysg gerllaw gofron,

16	Lle claer tes, lle clywir ton,

	I ochel awel aeaf,

	O ras hir, i aros haf.

	'O thry i'th ogylch, iaith ddrud,

20	Treiglwr, chwibanwr traglud,

	Â bollt benfras a bwa,

	A'th weled, ŵr, i'th wâl da,

	Na chudd er ei lais, na chae

24	Dy lygad dan dy loywgae.

	Eheda, brysia rhag brad

	A thwyll ef o'th ddull hoywfad

	O-berth-i-berth, drafferth drwch,

28	O-lwyn-i-lwyn anialwch.

	Glân dy dro, o glŷn dy droed

	I mewn magl ym min meigoed,

	Na fydd, dilonydd dy lam,

32	Wrth gryngae, groglath gringam.

	Tor yn lew i am d'ewin

	Â'th dduryn cryf wyth rawn crin;

	Trist big, hen goedwig a gâr,

36	Trwyddau adwyau daear.

	'Disgyn heddiw ger rhiwallt

	Is tŷ gwen, ys teg ei gwallt,

	A gwybydd, er delw Gybi,

40	Ger rhiw, a yw gywir hi.

	Gŵyl ei thro, gwylia a thrig

	Yno, ederyn unig.'

	'Bai reitiaf dy rybuddiaw,

44	Tydi, fab teg arab: taw!

	Rhywyr, mau ofn y rhewynt,

	Y gwylir hi, gwael yw'r hynt;

	Eres hyd y bu'n oeri,

48	Aeth arall hoywgall â hi.'

	'Os gwir, edn, mau ehednwyf

	Is gil serch, ysgeulus wyf,

	Gwir a gant, gwarant gwiwras,

52	Y rhai gynt am y rhyw gas:

	"Pren yng nghoed"—mawroed yw'r mau—

	"Arall â bwyall biau."'