Ei Gysgod

	Yr oeddwn ddoe o dan y dail prydferth

	yn aros am ferch, un debyg i Elen,

	[ac] yn cysgodi rhag y glaw o dan glogyn iraidd

4	y fedwen, fel un o'i gof.

	Uwch fy mhen gallwn weld rhyw ffurf

	yn sefyll ar ei phen ei hun [a golwg] ffiaidd [arni].

	Ciliais i ffwrdd i'r cyfeiriad arall

8	fel [y gwnâi pob] creadur diniwed,

	a chroesi fy nghorff [gan lefaru] swynau saint

	[i'm diogelu] rhag perygl enbyd.

	'Dywed yn awr, a rho'r gorau i'th fudandod,

12	yr wyt [yn debyg i] ddyn [bydol], pwy wyt ti'.

	'Fi, dy gysgod hynod dy hun,

	a rho'r gorau i'th holi.

	Bydd yn dawel, yn enw Mair, paid â llesteirio [dy] fuddiannau [dy hun],

16	er mwyn i mi gael cyfleu fy nghenadwri.

	Yr wyf yn dod yma ger dy fron

	yn fy noethni [cynhenid], gweithred fuddiol [yw hon],

	er mwyn dangos [i ti], y gŵr gwych sy'n lled-gwyno,

20	sut un wyt ti. Mae grymoedd dieflig wedi dy feddiannu'.

	'Nage, y gŵr hael, yr adyn salw,

	nid un felly wyf fi, golwg ellyll.

	[Un] o'r un ymddangosiad â gafr gefngrom,

24	yr wyt yn debycach, cyffelybiaeth ryfedd,

	i ddrychiolaeth [sy'n peri] gwae

	nag i ddyn yn ei briod wedd.

	Porthmon mewn dillad du a gwyn yn cega,

28	coesau gwrach ar ffyn tywyll;

	bugail ellyllon ofergoelus,

	bwbach ar ffurf mynach moel;

	gorcheidwad praidd yn esgus bod yn farch heglog,

32	crëyr tal yn pori brwyn y gors;

	garan yn ymestyn i'w llawn faintioli,

	esgeiriau ysbryd, ar gyrion y cae ŷd;

	gwedd pererin hanner-pan,

36	gŵr tebyg i'r brodyr duon mewn clogyn clytiog;

	ffurf celain wedi ei wisgo mewn lliain,

	ym mha le y buost, yr hen bolyn buarth?'

	'Gyda thi yn gyson pe bawn yn [dewis] edliw hynny i ti.

40	Gwae di os gwn dy hanes'.

	'Pa drosedd arall a briodolir i mi

	y gwyddost amdani, gwddf piser,

	nad yw pob un arall call yn y byd crwn

44	yn ei wybod [eisoes]? Tydi yr adyn dieflig!

	Ni ddifriais fy mro,

	ni roddais ergyd hwyrfrydig, gwn yn iawn;

	ni fûm yn ymosod ar ieir â ffon dafl,

48	ni pherais arswyd i rai diniwed;

	ni wnaf ddim sy'n anghyson â'm greddf,

	ni rwystrais wraig gŵr dieithr [rhag fy nghael]'.

	'Ar fy llw, pe bawn yn datgan

52	i'r rhai hynny na wyddant yr hyn a wn,

	cyn gallu rhwystro hynny, dyma fy marn,

	yn fuan ac yn anochel caet dy grogi'.

	'Ymatal rhag cyfaddef yn awr yr hyn a wyddost,

56	y rhwystr garw, [ac] ymdawela

	yn fwy na phe bai, tra byddi'n perthyn i mi,

	bwythau ar ymylon dy geg'.