Y Cloc

	Dull cynnar, arfaeth cain,

	canu yr wyf fi gant o gyfarchion

	i'r dref hyfryd ger Rhiw Rheon

4	wrth ymyl y graig, a'r gaer gron.

	Yno mae un oedd yn fy adnabod,

	roedd ei enw'n hysbys gynt.

	Henffych heddiw yma

8	hyd yng nghartref yr un da.

	Mae'r ferch fonheddig a doeth

	yn fy annerch bob nos.

	Pan fo fy meddwl yn cysgu (a thoredig oedd [y cwsg] a gafwyd),

12	breuddwyd yw, prin y mae'n llefaru,

	a'm pen ar y gobennydd,

	draw y daw cyn y wawr

	yn rhith angel bach (delw bell-gyrhaeddol)

16	i wely'r ferch.

	Roeddwn yn credu yr adeg honno

	fy mod acw yn cydorwedd â'm cariad.

	Roedd pellter mawr rhyngof fi a'i hwyneb

20	pan ddihunais, y cof sy'n edrych amdani.

	Damio'r cloc du ei wyneb

	yn ochr y mur a'm dihunodd.

	Boed ei ben a'i dafod yn ofer

24	a'r ddwy raff sydd ganddo a'i olwyn,

	a'i bwysau, talpiau pŵl,

	a'i ochrau a'i forthwyl,

	a'i hwyaid yn meddwl ei bod yn ddydd,

28	a'i beirianwaith di-baid.

	Cloc annymunol fel clec wallgof

	crydd meddw, boed melltith ar ei wyneb,

	cleddyf tincer twyllodrus,

32	sŵn rhincian ci yn taro dysgl,

	clec fynych melin ddrychiolaeth

	yn malu gyda'r nos yng nghlawstr mynachlog.

	A fu cyfrwywr (strapen grachennog)

36	neu döwr mwy gwamal?

	Dinistr marwol ar ei lef

	am ddod â fi yn ôl yma o'r nefoedd.

	Roeddwn yn cael (cofleidiad cysurus)

40	cwsg nefolaidd am hanner nos

	ym mhlygion breichiau hir y ferch hon,

	ym mhlith Saeson ym mhleth dwyfron.

	Eigr y wlad, porthiant tristwch,

44	a fydd y fath weledigaeth i'w gweld byth eto?

	Rhed ati hi eto ar daith,

	freuddwyd, ni fydd rhwystr i ti ar dy ffordd.

	Gofynna i'r ferch dan y gorchudd euraid

48	a ddaw cwsg iddi heno

	i roi golwg o'r galon

	arni unwaith, nith yr haul.