Y Ffenestr

	Cerddais o fewn cadleisiau,

	Cerdd wamal fu'r mwngial mau,

	Gan ystlys, dyrys diroedd,

4	Hundy bun, hyn o dyb oedd.

	Da arganfod, dewr geinferch,

	Drwy frig y llwyn er mwyn merch,

	Ffyrf gariad, dygiad agerw,

8	Ffenestr gadarn ar ddarn dderw.

	Erchais gusan, gwedd lanach,

	I'r fun drwy'r dderw ffenestr fach,

	Gem addwyn, oedd gam iddi,

12	Gomeddodd, ni fynnodd fi;

	Astrus fu'r ffenestr oestraul,

	Lle'i rhoed i ddwyn lleufer haul.

	Ni bwy' hen o bu o hud

16	Ffenestr â hon un ffunud,

	Dieithr hwyl, dau uthr helynt,

	Yr hon ar Gaerlleon gynt

	Y dôi Felwas o draserch

20	Drwyddi heb arswydi serch,

	Cur tremynt cariad tramawr,

	Gynt ger tŷ ferch Gogfran Gawr.

	Cyd cawn fod pan fai'n odi

24	Hwyl am y ffenestr â hi,

	Ni chefais elw fal Melwas,

	Nychu'r grudd, Dduw, nacha'r gras.

	Betem, fi a'm dlifem dlos,

28	Wyneb yn wyneb nawnos,

	Heb ŵyl sâl, heb olau sêr,

	Heb elw rhwng y ddau biler,

	Mwy'r cawdd o boptu'r mur calch,

32	Finfin, fi a'm dyn feinfalch,

	Ni allem, eurem wryd,

	Gael y ddau ylfin i gyd.

	Ni eill dau enau unoed

36	Drwy ffenestr gyfyngrestr goed,

	F'angau graen, fy nghaeu o gred,

	'Fengyl rhag ei chyfynged.

	Ni phoened neb wrth ffenestr

40	Rhwng ffanugl nos a rhos restr,

	Heb huno, fal y'm poenwyd,

	Heb hwyl hoyw am ddyn loyw lwyd.

	Torrid diawl, ffenestrawl ffau,

44	Â phŵl arf ei philerau,

	Awchlwyr llid, a'i chlawr llydan,

	A'i chlo a'i hallwedd achlân,

	Ac a wnaeth, rheolaeth rhus,

48	Rhyw restr bilerau rhwystrus;

	Lladd cannaid a'm lludd cynnif,

	A'r llaw a'i lladdodd â llif,

	Lladd dihir a'm lludd dyun,

52	Lluddiodd fi lle 'dd oedd y fun.