Y Cleddyf

	Rhyhir wyd a rhy gyflun,

	Rho Duw, gledd, ar hyd y glun.

	Ni ad dy lafn, hardd–drafn hy,

4	Gywilydd i'w gywely.

	Cadwaf i di i'm deau,

	Cedwid Duw y ceidwad tau.

	Mau gorodyn, mygr ydwyd,

8	Meistr wyf a'm grymuster wyd.

	Gŵr fy myd ni gar fy myw,

	Gwrdd ei rwystr, gerddor ystryw,

	Tawedog, enwog anwych,

12	Tew ei ddrwg, mul wg mal ych.

	Gweithiau y tau, amod da,

	Ac weithiau y'm bygythia.

	Tra'th feddwyf, angerddrwyf gwrdd,

16	Er ei fygwth, arf agwrdd,

	Oerfel uwch ben ei wely,

	A phoeth fo dy feistr o ffy

	Nac ar farch, dibarch dybiaw,

20	Nac ar draed er y gŵr draw,

	Oni'm pair rhag deuair dig

	Cosb i'th ddydd, casbeth Eiddig.

	Catgno i gilio gelyn,

24	Cyrseus, cneifiwr dwyweus dyn,

	Coethaf cledren adaf wyd;

	Collaist rwd, callestr ydwyd.

	Coelfain brain brwydr, treiglgrwydr trin,

28	Cilied Deifr, caled deufin,

	Cyfylfin cae ufelfellt,

	Cadwaf dydy i'th dŷ dellt.

	Cwysgar wyd rhag esgar ym,

32	Cain loywgledd canoliglym.

	Llym arf grym, llyma f'aur gred,

	Lle y'th roddaf llaw a thrwydded:

	Rhag bod yng nghastell celli

36	Rhyw gud nos i'n rhagod ni,

	Rhwysg mab o fuarth baban,

	Rhed, y dur, fal rhod o dân.

	Na chêl, ysgwyd Guhelyn,

40	Ar fy llaw o daw y dyn.

	Glew sidell, gloyw osodau,

	Rhyfel wyd, y metel mau.

	Hwn a'm ceidw rhag direidwyr,

44	Ehuta' cledd, ŵyr Hawt–clŷr.

	Ar herw byddaf ar hirwyl

	Dan y gwŷdd, mi a'm dyn gŵyl.

	Nid ansyberw ym herwa

48	Os eirch dyn, nid o serch da.

	Talm o'r tylwyth a'm diaur,

	Tew fy ôl ger tŷ fy aur.

	Ciliawdr nid wyf, wyf Ofydd,

52	Calon serchog syberw fydd.