Trafferth Mewn Tafarn

	Deuthum i dref ddewisol

	a'm gwas hardd i'm canlyn.

	Gwariant llawen a theg, lle ardderchog am ginio,

4	cymerais lety cyhoeddus digon urddasol

	(bûm yn ddyn ifanc gwych / balch),

	ac fe gefais win.

	Gwelais ferch fain a theg

8	yn y tŷ, fy un gariad hardd.

	Rhoddais fy mryd yn llwyr

	ar f'anwylyd fain, yr un lliw â haul y bore,

	prynais gig rhost a gwin drud

12	(nid er mwyn dangos fy hun) [i] mi a'r ferch dlos acw.

	Mae dynion ifainc yn hoffi chwarae gemau,

	gelwais ar y ferch, un wylaidd, i [ddod ataf ar] y fainc,

	ac fe gawsom wledd fawreddog,

16	un fwy na gwledd briodas.

	Sibrydais ddau air hudolus

	(bûm yn ŵr hy a dyfal, mae hynny'n sicr).

	Gwedi i'r rhwystr ddiflannu

20	ar ôl y sibrwd (ffawd agos),

	fe wnes i (ni bu serch yn segur / esmwyth)

	gytundeb i ddod at y ferch hyfryd

	pan fyddai'r torfeydd

24	yn mynd i gysgu; merch ag aeliau duon oedd hi.

	Ar ôl i bawb ond fi a'r ferch

	fynd i gysgu (truenus dros ben),

	ceisiais yn fedrus iawn gyrraedd

28	gwely'r ferch, [ond] aeth pethau o chwith.

	Cefais gwymp cas pan wnes i dwrw yna,

	doedd dim llwyddiant o gwbl.

	Brifais (ni neidiais yn ddianaf)

32	flaen fy nghoes uwchben y pigwrn

	(a gwae'r goes!) ar ochr stôl swnllyd ffôl

	o achos y tafarnwr.

	Trewais (mae gorawydd yn beth drwg)

36	lle'r oeddwn wedi fy ngosod, heb un naid rwydd,

	(dryswch aml gwrthdaro gwyllt)

	fy nhalcen wrth ben y bwrdd,

	lle'r oedd cawg erbyn hyn yn rhydd

40	a phadell bres swnllyd.

	Syrthiodd y bwrdd, dodrefnyn trwm,

	a'r ddau drestl a'r llestri i gyd.

	Rhoddodd y badell waedd,

44	fe'i clywid ymhell y tu ôl i mi.

	Gwaeddodd y cawg (dyn ofer oeddwn)

	a chyfarthodd y cŵn.

	Mae'n haws codi yn flêr

48	(drygioni ffôl) nag yn gyflym iawn.

	Deuthum i fyny (bu'n hanes i edifarhau amdano)

	— Cymry a'm câr! —

	lle'r oedd ger muroedd mawr

52	dri Sais mewn gwely drewllyd

	yn poeni am eu tri phac,

	Hicin a Siencyn a Siac.

	Hisiodd y penbwl dreflog ei geg

56	(casineb creulon) wrth y ddau [arall]:

	'Mae Cymro (cyffro ffyrnig dichellgar)

	yn symud o gwmpas yma'n dwyllodrus iawn;

	lleidr yw ef, os caniatawn iddo,

60	gwyliwch, gofalwch rhag hwn.'

	Cododd y tafarnwr yr holl bobl,

	ac roedd hi'n hanes enbyd.

	Roedden nhw'n gwgu o f'amgylch

64	bob yn naw yn chwilio amdanaf o'm cwmpas,

	a minnau (doluriau tost hyll)

	yn cadw'n dawel yn y tywyllwch.

	Gweddïais (nid mewn ffordd ddewr)

68	mewn cuddfan, fel rhywun ac ofn arno,

	a thrwy nerth gweddi ddiffuant annwyl,

	a thrwy ras y gwir Iesu,

	cyrhaeddais (penbleth anhunedd)

72	fy hen loches fy hun heb ennill dim.

	Dihengais i (diolch byth bod y saint yn agos),

	gofynnaf i Dduw am faddeuant.