Y Breuddwyd

	Fel yr oeddwn, gwn heb gelu,

	yn hepian mewn lle cuddiedig,

	gwelais freuddwyd gyda thoriad a gwawrio'r dydd

4	[ac] ar orwel y bore.

	Tybiwn fy mod yn cerdded

	a haid o gŵn hela [wrth gynllyfan] yn fy llaw,

	ac yn teithio gydol y dydd ar hyd y rhanbarthau

8	a'r tiroedd yr oeddwn yn gyfarwydd â hwy,

	ac yn disgyn i goedwig,

	[lle megis] plasty hardd, nid [megis] bwthyn taeog surbwch.

	Gollwngwn y cŵn i'r coed

12	heb oedi, felly y meddyliwn.

	Yr oeddwn yn heliwr da fel y credwn,

	taer a dilys [ei] reddf.

	Gallwn glywed bloeddiadau'r cŵn wrth hela,

16	lleisiau [llawn] ffyrnigrwydd, canu mynych.

	Gwelwn ewig wen uwch y meysydd,

	hoffi'r helfa yn fawr a wnawn,

	a haid o gŵn hela ar ras

20	ar ei thrywydd, cywir oedd eu cwrs.

	Cyrchu'r bryn [a wnaeth yr ewig], yn berffaith ei ffurf,

	a thros ddwy esgair a chrib,

	ac ymlaen dros y llethrau

24	ar wib a'i thaith [fel taith] hydd,

	a dod ar ôl iddi gael ei dofi,

	a minnau yn llawn angerdd, i geisio fy nawdd.

	[Ei] dwyffroen yn noeth; deffro a wneuthum.

28	Gŵr blysig [oeddwn]; yn y bwthyn y bûm [yr holl amser].

	Euthum drannoeth cyn gynted ag y gwawriodd

	i'r cyrion i geisio esboniwr.

	Pan ddaeth y dydd cefais hyd i wraig ddoeth,

32	a ffodus [oedd hynny].

	Cyfaddef a wneuthum wrthi

	yr hyn a welswn [sef] arwyddion y nos.

	'Myn Duw, y wraig ddoeth, pe bai modd i ti

36	gael gwared ar yr hud hwn,

	fe'th ganmolwn yn fwy na neb.

	Clwyfau lluosog sydd i'm rhan. Un diobaith wyf '.

	'Os wyt yn meddu ar gyneddfau gŵr,

40	y mae dy freuddwyd yn arwydd da, yr un diobaith.

	Y cŵn y bu i ti eu gweld yn amlwg yn dy law,

	pe bait yn deall [eu] hiaith daer,

	dy deithwyr, sicr eu trywydd,

44	[a]'th negeswyr gwrol ydynt,

	A'r ewig wen [oedd] yr arglwyddes

	yr oeddet yn ei charu, gwedd ewyn [y môr yn disgleirio dan yr] haul.

	Fe ddaw hi, ac y mae hyn yn sicr,

48	i geisio dy nawdd, a Duw sydd i'th fendithio'.