Y Galon

	O! y galon fach â phen crwn,

	gwaith disylw [ond] anorfod,

	a fu darn a achosai fwy o gystudd

4	na thi, gweithdy gwëydd barddoniaeth?

	Pererin, mynwes a'i magodd,

	cig hiraeth â phen gwyn.

	Merch gron daer ac angerddol iawn,

8	pentwr o feddyliau clir a disglair.

	Bydd yn ddisymud, dull heddychlon,

	[wedyn] bydd y siâp wy bach yn llenwi.

	Mae hon (cadair y fron,

12	enw cadarn, arllwysiad barddoniaeth,

	rhuo gwyllt) yn gwneud dyn anllad iawn a thruenus

	yn garwr cwrtais a hyderus.

	Boed i'r cwmni gwingar feddwl am

16	y ddiod fedd, mor dda y bu:

	mae hon yn gwneud dyn yn afradlon o hael,

	anrhegu di-ben-draw fel dŵr byrlymus,

	pererin brwnt, pidyn marwaidd pŵl

20	fel helmed oer yn ymestyn heibio gwisg ei ben-ôl,

	a [dyn] gorddewr ar heolydd,

	wyneb caled, ni bydd yno

	heb naill ai cael ei anafu

24	(sleifiwn i heibio), neu glwyfo rhywun yn sydyn.

	Yr ail beth yw datgan ar lafar

	yn fympwyol gywilydd ar farf rhywun.

	Y trydydd peth, ni fydd neb yn gwybod:

28	ystrywiau dyn sy'n chwennych

	cael rhyw ferch wen wylaidd

	yn gudd mewn godineb, camp wych.

	Dyna yw gwreiddyn y clefydau,

32	enw swydd fawreddog, honno yw f'un i.

	Nid oes dyn nac anifail dan y nefoedd

	mwy ei helynt, myn Duw, na fi

	yn canlyn, ymgyrraedd at serch,

36	er gwaethaf gwrthwynebiad pawb, yr un ferch,

	testun edmygedd y bobl, llewyrch disglair,

	gloyw, main ac addfwyn, gŵyr pawb pwy yw hi,

	llachar ysblennydd, fel wyneb y lleuad hardd,

40	Morfudd deg ei gruddiau, yn wir,

	lliw goleuni pan fo haul ffyrnig

	ar fryn, siriol ei golwg ddisglair,

	boneddiges dyner, merch ffyniannus sy'n darparu gwin,

44	heulwen a seren y serch.