Yr Het Fedw

	Yr het fedw, da y'th gedwir,

	Ys gwae Eiddig os gwir,

	Ysbail gwŷdd, cynnydd cannoed,

4	Ysgythrlen frig cangen coed.

	Os dewr wyf, ys diryfedd,

	Ystyriawl i'th fawl a'th fedd,

	Ystofiad coed, ys difai,

8	Ysgîn ddail mân wiail Mai.

	Ys da adail y'th eiliwyd,

	Ystôr gwrteisrym ym wyd.

	Duw a'th fawl, hawdd ganmawl hir,

12	Adeildo o fedw doldir.

	Gerland a roes dyn geirloyw,

	Gwmpas o'r fedwen las loyw.

	Call a difradw y'th gadwaf,

16	Coron rhag tra hinon haf.

	Culwas a'i dwg cyd ciliai,

	Cwfl ddiell o fantell Fai;

	Cydfaeth dyffryn, glyn gloywlas,

20	Coedfedw gwiw yn cydfod gwas;

	Gwrygiant serch eurferch erfai,

	Gwyrthiau a ffrwyth mwynllwyth Mai;

	Pwyll rhag anghof a gofal,

24	Pebyll uwch didywyll dâl;

	Mawl dyfiant, gwiw foliant gwŷdd,

	Mynwair o dewfrig manwydd;

	Gwawdau dâl gwiwdo deil-lwyn,

28	Gwyrdd gylch a ddiylch ei ddwyn;

	Gwawr gelfydd serch, gwir goelfain,

	Gwregys gwallt o'r goedallt gain;

	Gwiw adail heb adfeiliaw,

32	Gwaith wyd Morfudd Llwyd a'i llaw.