Campau Merch

	Y ferch borffor ei thorun,

	Hir nid addefir i ddyn.

	Anodd ym gysgu unhun

4	Pe canai Dduw huw ei hun.

	Aeth ulw dros frig wyth aelwyd,

	Oio, Gysgu ddu! Mae'dd wyd?

	Anhunog wyf, clwyf yw'r clo,

8	Anhunedd a wn heno.

	Mi a ddeily swrn meddyliau,

	Byth neud mul, am beth nid mau,

	Gwayw llid, er nas caf rhag llaw,

12	Gosyml oedd ym ei geisiaw,

	Nid amgen, gwen a'm gweeirdd,

	Eilwydd â bun a ladd beirdd.

	Dibwyll i fardd hardd heirddryw,

16	Dybio ei chael; dibech yw.

	Hael yn nhref am heilwin rhwydd,

	Hoen gwylan, hynag eilwydd.

	Gŵyr luddias gŵr i lwyddoed,

20	Gwrm ei hael, goryw ym hoed.

	Rhwydd am aur o'i goreurwyl,

	Afrwydd am eilwydd, em ŵyl.

	Ufyddgamp leddf i feddgell,

24	Diog i oed pwyllog pell.

	Mul yn chwarae â chlaear,

	Diful wrth y cul a'i câr.

	Hael am y parch nis archwyf,

28	Cybyddes am neges nwyf.

	Dilaes y deily heb ystryw

	Olwg ar ŵr, ail Eigr yw.

	Digollwawd bardd digellwair,

32	Da ei chlod, diuchel air;

	Dyfr o bryd, a'm byd o'm barn,

	Difawr ei brys i dafarn;

	Dihoffedd bryd a gwedd gwŷr,

36	Dihustyng, da ei hystyr;

	Diddig yn cynnig ciniaw,

	Dig wrth ei llatai o daw;

	Dyddig ei phendefigwalch

40	Wrth wŷr y byd, bywyd balch.

	Ni bu, nid oes i'n oes ni,

	Ni bydd tebig neb iddi.

	Nid mor ddiareb nebun

44	I'n gwlad ni â hi ei hun:

	Yn hael iawn, yn hil ynad,

	Yn heilio gwledd, yn haul gwlad,

	Yn fonheddig, yn ddigardd,

48	Yn fain ei hael, yn fun hardd,

	Yn ennill clod, yn annwyl,

	Yn dda ei thwf, yn ddoeth ŵyl,

	Yn rhy ddiwair ei heirioes,

52	Yn ddyn mwyn, dda iawn ei moes.

	Tyfodd ym frad lleuad llu,

	Twf coeth tawelddoeth aelddu.

	Tegau iesin ddoethineb,

56	Tegach oedd honno no neb.