Merch Ragorol

	Tair gwragedd â'u gwedd fal gwawn

	A gafas yn gwbl gyfiawn

	Pryd cain, pan fu'r damwain da,

4	A roes Duw Nef ar Efa.

	Cyntaf o'r tair disgleirloyw

	A'i cafas, ehudras hoyw,

	Policsena ferch Bria',

8	Gwaisg o grair yn gwisgo gra.

	Yr ail fu Ddiodemaf,

	Gwiwbryd goleudraul haul haf.

	Trydedd fun, ail Rhun yrhawg,

12	Fu Elen feinwen Fannawg,

	Yr hon a beris cyffro

	A thrin rhwng Gröeg a Thro.

	Pedwaredd, ddisalwedd serch,

16	Y gain eglurfain glaerferch

	Yn dyfod yn deg ddiseml,

	Llywy aur dydmwy, i'r deml,

	A lluoedd arni'n edrych

20	Ar lawr, ddisgleirfawr wawr wych.

	A myfy, doeth ym ofeg

	Ymofyn pwy'r dynyn deg.

	'Chwaer yw hon, lon oleuloer,

24	Undad â'r lleuad, i'r lloer,

	A nith i des ysblennydd,

	A'i mam oedd wawr ddinam ddydd,

	Ac o Wynedd pan henyw,

28	Ac ŵyr i haul awyr yw.'

	Nid gwen gwraig ar a adwaen,

	Nid gwyn calch ar siambr falch faen,

	Nid gwen gwelwdon anghyfuwch,

32	Nid gwyn ewyn llyn na lluwch,

	Nid gwyn pryd dilis disglair

	Wrth bryd gwyn fy myd, myn Mair!

	Cyngwystl a wnawn cyn cyngor,

36	Lliw ton geirw pan feirw ar fôr,

	Nad byw'r Cristion crededun

	A gâi le bai ar liw bun,

	Onid ei bod yn glodgamp,

40	Duw'n fach, yn loywach no'r lamp.

	Na fid rhyfedd gan Gymro

	Alw bun o'r eiliw y bo.

	Poed â'r gyllell hirbell hon

44	Y cordder gwâl ei galon

	A'i cymerai yn hyfryd

	Maddau bun a meddu byd.

	Po mwyaf fai fy nghyfoeth

48	A'm canmawl cynhwynawl coeth,

	Fwy fwy y clwyfai ar naid,

	Cof ynof, cyfyw f'enaid.

	Pa les i minnau, wyrda,

52	Maddau'r dyn a meddu'r da?

	Nid oes obaith eleni

	I'r dyn a fo hŷn no hi.