Morfudd yn Hen

	Rhöed Duw hoedl, rhad didlawd,

	Rhinllais frân, i'r rhawnllaes frawd.

	A geblynt, ni haeddynt hedd,

4	Y brawd o gysgawd gosgedd

	Nêr a rifer o Rufain,

	Noeth droed, ŵr unwallt nyth drain.

	Rhwyd yw'r bais yn rhodio'r byd,

8	Rhyw drawsbren, rhad yr ysbryd,

	Periglor gerddor geirddoeth,

	Barcutan, da y cân, Duw coeth.

	Mawr yw braint siartr ei gartref,

12	Maharen o nen y nef.

	Huawdl o'i ben gymhennair,

	Hoedl oe fin, hudol i Fair.

	Ef a ddywawd, wawd wydnbwyll,

16	Am liw'r dyn nid aml ar dwyll:

	'Cymer dy hun, ben cun cant,

	Grysan o'r combr a'r grisiant;

	Gwisg, na ddiosg wythnosgwaith,

20	Gwasgawd mwythus lyfngnawd maith.'

	– Dirdrais fu ym, chwedl ail Dirdri –

	'Duach fydd' – a dwyoch fi!

	Foel-llwyd ddeheuwawd frawd-ddyn,

24	Felly'r brawd du am bryd dyn.

	Ni pheidiwn, pe byddwn Bab,

	Â Morfudd tra fûm oerfab.

	Weithion, cyhuddeidion cawdd,

28	Y Creawdr a'i hacraawdd,

	Hyd nad oes o iawnfoes iach

	Un lyweth las anloywach,

	Nid â fal aur da liw'r dyn,

32	Brad arlwy, ar bryd erlyn.

	Brenhines bro anhunedd,

	Brad y gwŷr o bryd a gwedd,

	Braisg oedd, un anun einioes,

36	Breuddwyd yw; ebrwydded oes!

	Ysgubell ar briddell brag,

	Ysgawen lwydwen ledwag.

	Hudolaidd y'i hadeilwyd,

40	Hudoles ladrones lwyd.

	Henllath mangnel Gwyddeleg,

	Hafod oer; hi a fu deg.