Yn y Winllan

	Digiais am na chawn Degau:

	Dihun, hael fun, yw'r hwyl fau;

	Dyfod dan wyrddion defyll—

4	Bid ei chael—dail bedw a chyll,

	Can hawddfyd, ar hyd y rhiw

	I winllan bun ewynlliw;

	Tuchan yn daer wrth gaer galch

8	A griddfan am Eigr ruddfalch.

	Pan glybu bun, harddlun hyd,

	Gwynfan Trystan rhag tristyd,

	Llariaidd y rhoes drwy foes fwyn

12	Llef aur ar ei llawforwyn,

	'Y mae draw mewn anghyflwr

	Yn y winllan gwynfan gŵr.

	Myfy a af, mwy ofal,

16	Morwyn deg â mirain dâl,

	Drwy wydrin draw i edrych—

	Truan oer mewn tro a nych—

	Pa drychiolaeth, gaeth geithiw,

20	Y sydd yn y gwinwydd gwiw.'

	'Un diriaid, Enid oroen,

	Enaid, em honnaid, ym mhoen.'

	'Pa un wyd yn penydiaw

24	Dy glwyf i mewn ôd a glaw?'

	'Dy fardd poenedig digus,

	Dewrfawr wyf mewn dirfa rus.'

	'Dos ymaith rhag dy siomi,

28	Dilwydd daith, neu dy ladd di!'

	'Oernos a welych arnaf,

	'Y myd aur, i mi od af,

	Oni wypwy', clydwy clod,

32	Pwy drechaf, myn Pedr uchod,

	Ai ti ai mi o 'mafael,

	Ai mi ai ti, fy myd hael.

	Glân oedd i'm enaid, o glod

36	Fy aur eirian, farw erod.

	Dillwng dy fardd a dwyllwyd

	I mewn, ddyn, i'r man ydd wyd

	Neu ddyred, och! neur dderwyf,

40	Yman, ddyn, i'r man ydd wyf.'

	'Ni wnaf, ddyn truan annoeth,

	Yr un o'r ddau, mau rin ddoeth.

	Pa beth a gais gŵr o bell,

44	Geirfas dwf, ger fy 'stafell?'

	'Ceisio heb gur drwy'r mur maen

	Dy weled, loywged liwgaen.'

	'Pa ddysged neu pa ddisgwyl

48	Ydd wyd, y gwas gwiwlas gŵyl?'

	'Dwysgall dyall a'm diaur,

	Disgwyl llun dyn dwysgall aur.'

	'Pa ryw orllwyn mewn llwyni

52	Yn y dail yna wnai di?'

	'Gorllwyn dyn mwyn, dawn im wyd,

	Nid gorllwyn gwraig y garllwyd!'