Englynion i Ifor Hael

	O haelder, fy nêr, fy Nudd—a'm aergaer

	A'm eurgarw hael am fudd,

	Afarwy, gaethrwy gythrudd,

4	Ofer un wrth Ifor udd.

	O ddewredd hoywgledd, hyglaer—ymadrodd,

	A medru treio aer,

	O fawrgyrch hylithr, f'eurgaer,

8	Ofer dau wrth Ifor daer.

	O ddoethineb, neb nid nes ataw—Ffranc

	Nog o Ffrainc i Fanaw,

	I fwrw dadl swrth oddi wrthaw,

12	Ofer dri wrth Ifor draw.

	O ufudd-dawd, ffawd a ffydd—a chiried,

	A charu ei brydydd,

	Ofer bedwar, hawddgar hydd,

16	Wrth Ifor, euriaith Ofydd.

	O fonedd, trasedd, ŵr trasyth—a ffin,

	A ffyniant aml dilyth,

	O weilch, uchel wehelyth,

20	Ofer bump wrth Ifor byth.

	O gryfder, fy ffêr, ffyrf dëyrn—eurdeg

	Yn dwyn eurdo hëyrn,

	Faedd cad i faeddu cedyrn,

24	Ofer chwech wrth Ifor chwyrn.

	O degwch, brifflwch brafflyw—urddedig,

	Pendefig rhyfig rhyw,

	Ei fardd wyf, o ddwfn ystryw,

28	Ofer saith wrth Ifor syw.

	O ddisymlrwydd swydd, gyfansoddwr—bardd,

	Enaid beirdd a'u clydwr,

	Afar brwydr i fwrw bradwr,

32	Ofer wyth wrth Ifor ŵr.

	O gampau gorau a garaf—ar ŵr,

	Eryraidd y'i barnaf,

	O roddion aml a rhwyddaf,

36	Ofer naw wrth Ifor naf.

	O wychder, fy nêr un arial—â Ffwg,

	Morgannwg mawr gynnal,

	Ofer dyn, fwriad anial,

40	Ofer deg wrth Ifor dal.