Diolch am Fenig

	Ifor ydoedd afradaur,

	O'i lys nid âi bys heb aur.

	Doe yr oeddwn ar giniaw

4	I'w lys yn cael gwin o'i law.

	Mi a dyngaf â'm tafawd,

	Ffordd y try dydd, gwëydd gwawd:

	Gorau gwraig hyd ar Geri

8	A gorau gŵr yw d'ŵr di.

	Tra fu'n trafaelu trwy fodd,

	Trwy foliant y trafaelodd.

	Y dydd y doethum o'i dai

12	Â'i fenig dwbl o fwnai,

	Benthig ei fenig i'w fardd

	A roes Ifor resawfardd.

	Menig gwynion tewion teg

16	A mwnai ym mhob maneg:

	Aur yn y naill, dyaill dau,

	Arwydd oedd, o'r llaw orau,

	Ac ariant, moliant milioedd,

20	O fewn y llall, f'ynnill oedd.

	Merched a fydd yn erchi

	Benthig fy menig i mi.

	Ni roddaf, dygaf yn deg,

24	Rodd Ifor rwydd ei ofeg.

	Ni chaiff merch, er eu herchi,

	Mwy no gŵr, fy menig i.

	Ni wisgaf fenig nigus

28	O groen mollt i grino 'mys.

	Gwisgaf, ni fynnaf ei fâr,

	Hyddgen y gŵr gwahoddgar,

	Menig gŵyl am fy nwylaw,

32	Ni bydd mynych y'u gwlych glaw.

	Rhoddaf i hwn, gwn ei ged,

	O nawdd rugl neuadd Reged,

	Bendith Taliesin wingost

36	A bery byth heb air bost.

	Ar ben y bwrdd erbyn bwyd

	Yno'r êl yn yr aelwyd,

	Lle trosaf ran o'm annerch,

40	Lle dewr mab, lle diwair merch,

	Lle trig y bendefigaeth,

	Yn wleddau, 'n foethau, yn faeth,

	Yn wragedd teg eu hegin,

44	Yn weilch, yn filgwn, yn win,

	Yn ysgarlad, rhad rhydeg,

	Yn aur tawdd, yn eiriau teg.

	Nid oes bren yn y Wennallt

48	Na bo'n wyrdd ei ben a'i wallt,

	A'i gangau yn ogyngerth

	A'i ŵn a'i bais yn un berth.

	Ponid digrif i brifardd

52	Gweled, hoyw gynired hardd,

	Arglwyddïaeth dugiaeth deg

	A seiliwyd ym Masaleg?

	Menig o'i dref a gefais,

56	Nid fal menig Seisnig Sais,

	Menig, pur galennig, pôr,

	Mwyn gyfoeth, menig Ifor.

	Fy mendith wedi'i nithiaw

60	I dai Ifor Hael y daw.