Lladrata Haf

	Digrif fu fy ngwaith neithiwyr

	Rhwng gras a dawn brynhawn hwyr,

	Cyfliw gŵr, cael ei garu,

4	Glew rhwng llen dew, â llwyn du.

	Ceiliog bronfraith cyweithias

	Odduwch fy mhen ar len las

	Yn gyrru, cynnyrch cyrch cof,

8	Coelfain enw, calon ynof.

	'Gwyddwn yt gyngor gwiwdda,

	Hir ddyddiau Mai: os gwnai, gwna,

	Ac eistedd dan fedw gastell –

12	Duw a ŵyr na bu dŷ well –

	A than dy ben gobennydd

	O fanblu, gweddeiddblu gwŷdd,

	Ac uwch dy ben, fedwen fau,

16	Gaer loywdeg o gwrlidau.'

	Nid wyf glaf, ni fynnaf fod,

	Nid wy' iach, myn Duw uchod,

	Nid wyf farw, 'm Pedr ddiledryw,

20	A Duw a farn nad wyf fyw.

	Bei cawn un, eiddun addef,

	Gras dawn oedd gan Grist o nef,

	Ai marw'n ddiran annerch

24	Ai byw'n ddyn syw i ddwyn serch.

	E' fu amser, neur dderyw,

	Och fi, ban oeddwn iach fyw,

	Na châi Grist, uchel Geli,

28	Ledrata haf arnaf i!