Yr Iwrch

	Tydi'r iwrch â'r afl ffoadur,

	un sy'n hedfan trwy'r awyr, â'r trowser llwydwyn,

	dos â hyn o lythyr cyflym a chain

4	ar dy din noeth er mwyn Duw o nef.

	Ti â'r fynwes lamsachus yw'r negesydd

	cyflymaf, canwr celfydd.

	Myn Duw, iwrch, rhaid gofyn

8	i ti wneud gwaith negesydd.

	Gwâl yn y grug uwchben y graig wen,

	mae'r un â'r pen heb ei ddofi yn pori glaswellt.

	Gofynnwr tâl gwych a chwrtais,

12	un sy'n llamu i fyny'r rhiw, llym yw ei gorn.

	Mae'n llamu fel oen tinnoeth

	i'r rhiw, teg yw ei wyneb a'i ffroen.

	Fy ngwasanaethwr gwych, ni chei di dy fradychu,

16	ni fydd cŵn yn dy ladd, y barwn hardd a thal.

	Amcan canmoladwy, paid â gadael i filgi

	dy ddal di ar ôl gwres.

	Ti yw fy negesydd serch bonheddig ei natur

20	a'm bardd at Ddyddgu hardd a bonheddig.

	Cymer di, yr un sy'n trotian yn deg,

	y daith hon i dŷ ei thad.

	Paid ag ofni saeth finiog,

24	na chi ar dy ôl os cei gyfle i neidio.

	Gwylia rhag Pali, ci â choesau coch,

	ac Iolydd, ci lliw efydd coch.

	Llef sy'n swnio fel cŵn hela,

28	os daw yn d'ôl i dir Tywyn

	dos i'r gors, yr un sy'n dewis rhwystr,

	gafaela yn null Ofydd.

	Neidia dros hen fwlch

32	i'r tir agored a phaid ag oedi mwy.

	Yr un a fu'n fab maeth erioed i goed hardd y dyffryn,

	main yw dy goes, mynna di gusan.

	Gwylia, paid â chael dy weld,

36	rheda dros fryn i lwyn rhedyn.

	Dere gyda'r nos heibio'r ffosydd

	dan ganghennau'r fforest a'i choed

	â chusan i mi [gan] Ddyddgu liw plu eira â'r plethau disglair,

40	ni fydd y ferch gefnsyth yn fy siomi.

	Cyrcha yno, yr iwrch gwych,

	[lle] carwn a dymunwn fy mod.

	Ni fydd llaw yn dy flingo, bydd di'n iach a dibryder,

44	ni fydd dy groen yn mynd yn wisg i hen Sais,

	na'th gyrn, f'anwylyd, na'th garnau,

	ac ni chaiff y Gŵr Eiddig ffals mo'th gig.

	Boed i Dduw dy gadw, ceidwad doeth,

48	a braich Cynfelyn rhag brad.

	O byddaf fyw i fod yn hen fe wnaf innau

	dy fendithio, yr un â'r wyneb lliw egroesen.