Y wefan hon fydd cartref golygiad newydd o farddoniaeth Dafydd ap Gwilym a agorir i’r cyhoedd ym mis Ebrill 2007. Mae’r golygiad yn ffrwyth prosiect pedair blynedd a ariannwyd gan Fwrdd Ymchwil y Celfyddydau a’r Dyniaethau.
Arweinydd y prosiect yw’r Athro Dafydd Johnston o Brifysgol Cymru Abertawe, ac mae’r tîm yn cynnwys aelodau o dair Adran Gymraeg, Dr Huw M. Edwards (PC Aberystwyth), Dr Dylan F. Evans (Prifysgol Caerdydd) a Dr A. Cynfael Lake (PC Abertawe), ynghyd â thri chynorthwy-ydd ymchwil, Dr Sara Elin Roberts (2002–6), Dr Elisa Moras (2003–4) ac Ifor ap Dafydd (2005–7), a swyddog technegol, Alexander Roberts.
Bydd y golygiad yn cynnwys:
- 170 o gerddi (19 ansicr eu hawduraeth)
- testun golygedig o bob cerdd
- aralleiriad Cymraeg
- cyfieithiad Saesneg
- nodiadau manwl
- testunau’r prif gopïau llawysgrif
- lluniau digidol o’r llawysgrifau cynharaf
- stema yn dangos perthynas y llawysgrifau
- darlleniad wedi’i recordio
Yn y Rhagymadrodd trafodir:
- bywyd a chefndir y bardd
- y cyd-destun llenyddol yng Nghymru ac Ewrop
- crefft y cerddi
- y cyfeiliant cerddorol
- traddodiad y llawysgrifau
- egwyddorion golygyddol
- awduraeth
- cerddi’r apocryffa
Gellir chwilio’r testunau trwy gyfrwng mynegair cyflawn, a rhestrir cynnwys y llawysgrifau mewn cronfa ddata.
Rhoddir sylw arbennig i’r ddau gywydd o waith Dafydd ap Gwilym sydd ar y maes llafur Safon A, gan gynnwys eglurhad gweledol o bob cynghanedd.
Cynhelir cynhadledd ddeuddydd i lansio’r golygiad ym Mhrifysgol Abertawe, 4– 5 Ebrill 2007.
Yn rhan o’r gynhadledd bydd cyngerdd yng Nghanolfan Dylan Thomas nos Fercher 4 Ebrill lle bydd Dr Sally Harper o Adran Gerddoriaeth Prifysgol Cymru Bangor yn cyflwyno datganiadau o rai o’r cerddi gan Dr Meredydd Evans i gyfeiliant y delynores Bethan Bryn, a pherfformiadau o rai o geinciau telyn llawysgrif Robert ap Huw gan Bill Taylor.
Am fwy o wybodaeth am y prosiect a’r gynhadledd
cysyllter ag Adran y Gymraeg, Prifysgol Abertawe,
i.ap-dafydd@abertawe.ac.uk, 01792 295193.
I weld rhaglen y gynhadledd cliciwch yma ac i gael ffurflen gofrestru cliciwch yma.