Nodwyddau Serch

	Dy gariad, Indeg oroen,

	Dygn y sydd, huelydd hoen,

	Ynof, gwas o nwyf a gwedd,

4	Yn fy mlino naw mlynedd.

	Ni bu ar les ei dadmaeth

	O hir gydmeithas was waeth.

	Moethus o was, lleas llaw,

8	Metheddig fab maeth iddaw.

	Llyna, Forfudd ddiledryw,

	A gaf o dâl, gofid yw.

	Py lan bynnag ydd elych,

12	Na Sul na gŵyl, f'annwyl fych,

	Caeed a wnaf, fy nyn llwyd,

	Ddeuddwrn i'r lle ydd eddwyd,

	Ac yno, em y genedl,

16	Oganus, chwarëus chwedl,

	Torri fy llygaid terrwyn

	Ar dy hyd, f'anwylyd fwyn.

	Ef a fydd y dydd ai deg

20	O nydwyddau, ai deuddeg,

	O'r amrant, er ymrwystr fydd,

	Bugeilaeth serch, bwygilydd,

	Hyd nad ymweisg, ddyn ddoethgall,

24	Un, aur ei llun, ar y llall.

	Tra fo fy llygaid, haid hawl,

	Yn agored engiriawl,

	Glaw a ddaw, dyn gloyw-wedd wyd,

28	O sugn y fron a ysigwyd.

	O ddinau'r ddeunant ar lled

	Odd yno, fy eidduned,

	Meddylia hyn, y feinferch,

32	Meddyliau o sugnau serch,

	Y daw glaw yn ôl praw prudd

	Hyd y farf, hydwf Forfudd.

	Cyd bwyf dalm, er salm, o'r Sul

36	Yn y glwysgor, un glasgul,

	Ni'm gwrthyd, dyfryd difreg,

	Pawb o'r plwyf, er nad wyf deg.

	Cyfraith serch y sy'n erchi,

40	Cymer dy hun yt, fun, fi.